Serikali ya Tanzania imeweka lengo la kuongeza wastani wa maisha ya Mtanzania kutoka miaka 68 ya sasa hadi miaka 75 ifikapo mwaka 2050, ikiwa ni sehemu ya utekelezaji wa maono ya Dira ya Taifa ya Maendeleo 2050. Lengo hili linakusudia kuhakikisha wananchi wanaishi maisha marefu, yenye afya bora na furaha.

Katika kufanikisha azma hiyo, serikali chini ya uongozi wa Rais Samia Suluhu Hassan imeanza kuchukua hatua madhubuti katika sekta ya afya kwa kuongeza uwekezaji mkubwa. Tangu mwaka 2021, bajeti ya Wizara ya Afya imeongezeka kutoka Shilingi bilioni 900 hadi kufikia Shilingi trilioni 1.6 mwaka 2025 – ongezeko ambalo linaashiria dhamira ya dhati ya kuboresha huduma za afya nchini.

Ongezeko hili la bajeti linatarajiwa kusaidia katika maeneo mbalimbali kama vile ujenzi wa miundombinu ya afya, upatikanaji wa dawa, vifaa tiba, pamoja na kuongeza idadi ya wataalamu wa afya nchini. Vilevile, linaweka msukumo mpya katika kukabiliana na magonjwa yasiyo ya kuambukiza, ambayo ni mojawapo ya changamoto kubwa kwa maisha marefu na yenye ubora.

Ushirikiano kati ya serikali, sekta binafsi na wadau wa maendeleo unahitajika ili kuhakikisha kuwa huduma za afya zinaboreshwa kwa wote, hasa katika maeneo ya vijijini na yaliyoko pembezoni.